OTTO RAHN: SIRVENT DEL GRASAL O DE L’ESVASTICA?

L’investigador Otto Rahn es una de las figuras mai controvertidas ligadas amb los estudis contemporanèus sul movement dels Bons Òmes, per la siá collaboracion amb lo Tresen Reich alemand.

Nascut a la vila de Michelstad dins la província d’Hessen l’an 1904, cresquèt en un ambient tipicament conservador e religiós. La siá familha voliá qu’estudiès Drech, e estudièt en divèrsas universitats alemandas, ont coneguèt un professor de religion de l’Universitat de Giessen, qual li parlèt pel primièr còp dels Bons Òmes.

La siá tèsi doctorala foguèt consacrada a l’òbra del poèta medieval Wolfram von Eschenbach, qui escriguèt “Perceval”, una de las òbras mai importantas del cicle del Grasal. Atrach, coma fòrça autres estudioses pel mite del Grasal, ensagèt deschifrar a quina montanha o quin endrech se fasián referéncia d’escrivans medievals coma lo meteis Wolfram Von Eschenbach o Chrétien de Troyes amb los noms Montsalvatsche o Montsalvat.

Otto Rahn supausèt inicialament qu’ambedós noms se fasián referéncia a la montanha mitica dels Bons Òmes, Montsegur, ont se refugièron de cresents en un long sètge entre los ans 1243 e 1244 que finalizèt amb la cremason de mai de dos cents “erètges”.

Après d’un sojorn a Paris, ont visitava sovent de cercles esoterics en ensajant trobar de responsas sus qualques mistèris dels Bons Òmes, viatgèt fins a Occitània, ont coneguèt Antonin Gadal, un grand investigador del Catarisme que pensava que lo Grasal e los Bons Òmes èran ligats. Visquèt pendent tres meses a L’Avelanet l’an 1929 e realizèt prospeccions per Montsegur, las siás caunas e los sieus entorns, ont reculhiguèt informacion per los sieus dos principals libres.

Otto_Rahn.

Otto Rahn

Mas l’istòria marcariá la trajectòria d’Otto Rahn. Adolf Hitler venguèt cancelièr d’Alemanha e comencèt a aplicar las siás politicas. Quin alemand que siá a França èra suspècte de desvolopar d’activitats d’espionatge, e Otto Rahn tornèt un temps a Alemanha, ont publiquèt “La Crosada contra lo Grasal” (“Kreuzzug gegen den Grial”) l’an 1933. A consequéncia de lo succès d’aquela publicacion, Heinrich Himmler, lo segond dirigent amb mai poder del Tresen Reich, s’interessèt per las siás investigacions. E Otto Rahn dintrèt en las SS nazis (1) coma sos-oficial  (“Unteroffizier”), segon sembla mai per besonh e obligacion, que per partejar las idèas de lo nazisme.

Heinrich Himmler èra ligat a divèrsas societats esotericas, e dempuèi l’”Anhenerbe” (2), un organisme creat pel regim que dirigissiá personalament, preteniá rescriure l’istòria alemanda e universala, en defendent l’existéncia d’una raça germanica qu’aviá totjorn existit, e la siá superioritat coma creadora de la civilizacion umana. L’”Anhenerbe” enviava d’expedicions arreu del mond a la recèrca d’indicis que demostrèsson aquelas teorias. Himmler tanben èra obsessionat coma Adolf Hitler sus l’importància de possedir d’objèctes mitics, sagrats o istorics qu’ajudèsson a la victòria militara. E lo Sant Grasal èra la pèça mai cobejada. E Otto Rahn aviá estudiat amb prigondor aquela reliquia.

Antoine_Gadal

Antonin Gadal

Himmler encarguèt a Otto Rahn que contunhèsse d’estudiar lo Sant Grasal, los Bons Òmes, e qu’ensagès trobar qualque ligam amb la tradicion germanica. D’aquela comanda sorgiguèt l’òbra “La cort de Lucifèr” (“Luzifers Hofgesind”) l’an 1937, fòrça difonduda pel regim nazi (3). La tèsi de Rahn en aquel estudi defendiá que los Bons Òmes consideravan pas Lucifèr coma lo Demòni de la tradicion crestiana, mas coma Luzbel, lo trasmeteire de la lutz, e identificat amb lo Nòrd (4).  Contrariament, Satan èra lo vertadièr Demòni, e èra identificat amb lo Sud.

Segon Otto Rahn en aquel libre, lo Grasal èra una pèira preciosa qu’aviá queigut de la corona que portava Lucifèr. Posteriorament, la Glèisa aviá pres lo mite del Grasal e l’aviá cristianizat, en identificant la reliquia amb la copa del Sant Sopar.(5) Considerava que los possibles destins del Grasal, gardat dins una montanha segon la tradicion, podián èsser l’occitana Montsegur o la catalana Montserrat (6).

Segon las siás teorias, se los Bons Òmes èran los guardians del Grasal, los crosats que volián maselar lo Catarisme èran los dolents. E se los Bons Òmes èran connectats amb una supausada (e absurda) filiacion germanica o nordica, los crosats èran del Sud (d’Euròpa) (7). Cossí podèm verificar, l’objectiu èra ensajar germanizar lo mite dels Bons Òmes e integrar lo movement en l’istòria germanica.

Mas Otto Rahn passèt de la glòria a la persecucion de la part del Tresen Reich. Foguèt expulsat o presentèt el meteis Rahn lo renonciament (segon las versions) de las SS sens saber exactament los motius en Febrièr de 1939. Entre las divèrsas suposicions dels motius de la percaça trobam la siá omosexualitat, los sieus problèmas amb l’alcoòl o unas possiblas originas josieus(8). O lo fach d’aver pas trobat encara lo Grasal malgrat los ans d’investigacion.

Mas poiriá tanben èsser que Otto Rahn foguèsse en desacòrdi amb la brutala repression exercida per las autoritats nazis contra determinats collectius. L’an 1937 èra estat barrat a Dachau pendent unes meses, en trabalhant coma susvelhant dels presoèrs del camp de concentracion, coma puniment per una baralha provocada per el meteis Otto Rahn jols efièches de l’alcoòl, e foguèt segurament testimòni de la brutalitat que s’exercissiá en aqueles camps de masèle.

dachau

Camp de masèle de Dachau

Oficialament, se suicidèt en lo 13 de Març de 1939, amb solament trenta cinc ans d’edat, en prenent una granda quantitat de medicaments per dormir o qualque sòrta de poison a Wilden Kaiser, als Alps austrians. Autras dison que practiquèt l’”endura” (9) e moriguèt per ipotermia. Mas i aguèt totjorn de dobtes sus la siá mòrt: suicidi o assassinat perque aviá descobèrt de causas? Quitament, trobam de dobtes sus la siá mòrt. Foguèt reala o una farsa e adoptèt una nòva personalitat? Qualqu’uns creson que podiá aver acabat en vivent amb un autre nom, e en morissent a edat avançada a l’Espanha franquista, mas semblan simplas especulacions (10).

En quin cas que siá, foguèt (e es encara) un personatge polemic dins dels estudis del movement dels Bons Òmes. Vertadièrament simpatizava amb lo nazisme? Collaborèt solament per aténher ajuda per contunhar los sieus estudis? Li calguèt desaparéisser per aver descobèrt qualque secrèt? O voliá pas contunhar amb la farsa de la germanizacion dels Bons Òmes?

Supausi que jamai pas saurem la vertat. Personalament, preferissi pensar que foguèt un grand estudiós atrach per l’istòria dels Bons Òmes, que se daissèt rosigar coma fòrça autres alemands pel nazisme, fins que volguèt s’aluenhar en veire los sieus resultats, mas èra ja tròp tard.

(1)    La Schutzstaffel (las SS) èra un còrs de seguretat del Partit nazi alemand, conegut per la siá violéncia.

(2)     Poiriam tradusir lo nom per “memòria ancestrala”.

(3)     Heinrich Himmler regalèt a Adolf Hitler una còpia de luxe de l’òbra.

(4)     Los pòbles germanics se tròban al Nòrd d’Euròpa.

(5)     En aquel ponch, Otto Rahn aviá rason. Lo mite del Grasal es anterior al cristianisme (proven benlèu de la mitologia celtica). Los libres del cicle grasalistic ligan pas lo Grasal en cap de moment als Evangèlis crestians. A causa de lo succès del mite en tempses medievales, la Glèisa crestiana associèt e cristianizà l’objècti amb la copa del Sant Sopar.

(6)    Justament, Heinrich Himmler realizèt una visita a l’abadiá de Montserrat l’an 1940, per ensajar trobar d’indicis de la preséncia del Sant Grasal.

(7)   Curiosament, avèm totjorn vist que la Crosada èra integrada per soldats e cavalièrs del Nòrd (las tèrras d’oïl) qu’atacavan la civilizacion qu’avián al sud (las tèrras d’òc), ont vivián majoritàriament los Bons Òmes.

(8)   Al Tresen Reich, los josieus o los omosexuals èran collectius perseguits, coma fòrça autres.

(9)    Una sòrta de suicidi que practicavan los Bons Òmes quand volián pas contunhar en vivent. Se retiravan sonque e sens manjar fins que la mòrt los arribava.

(10)   L’abséncia d’un certificat oficial de defuncion animèt a aquelas especulacions.

Advertisements

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Cambiar )

Google+ photo

You are commenting using your Google+ account. Log Out /  Cambiar )

Twitter picture

You are commenting using your Twitter account. Log Out /  Cambiar )

Facebook photo

You are commenting using your Facebook account. Log Out /  Cambiar )

Connecting to %s